သင့်နာမည်ကို ကောင်းလှပြီဟု ထင်နေပါသလား? ဒီလိုတွက်ကြည့်လိုက်ပါ

Knowledge
Spread the love

သင့်နာမည်ကို ကောင်းလှပြီဟု ထင်နေပါသလား?

လှနေတယ်လို့ရော ထင်နေပါသလား?

နေ့သင့်နံသင့်ဟုရော ထင်နေပါသလား?

မိတ်ဖက်တွေတွဲထားသလား?

ရန်ဘက်တွေရောတွဲမိနေသလား?

လူတစ်ယောက်အတွက် နာမည်သည်အရေးပါလှပေသည်။ လူရယ်ဟုဖြစ်လာပြီဆို နာမည်တစ်ခုရှိဖို့လိုအပ်ပေသည်။

တစ်ချို့လဲနှစ်ခု တစ်ချို့ကသုံးခု လောက်ရှိမည်။ တစ်ချို့ကမရေမတွက်နိုင်😂

😂 ထိုအရေးပါလှသောနာမည်ကို မွေးဖွားပြီး မကြာမှီတွင်ပေးတတ်ကြသည်။

လူတစ်ချို့ကအလွယ်ပေးသည်။ တစ်ချို့ကလေးနက်စွာစဉ်းစားသည်။ တစ်ချို့ကနားလည်တတ်ကျွမ်းသူများနှင့်တိုင်ပင်ပြီးမှ ပေးလေ့ရှိကြသည်။

နေ့သင့်နံသင့်တွေ လိုက်ဖက်မူတွေ လှပမူတွေ အထားအသို အညွန့်အတက် အခက်အဝေတို့စုံလင်လှပေသည်။

တစ်ချို့နာမည်များသည် ခေါ်လို့ကောင်းသည် တစ်ချို့နာမည်များသည်အေးသည် လှသည် ။ တစ်ချို့နာမည်များသည်လိုက်ဖက်သည်

(ဖြူဖွေးဆိုတဲ့နာမည်နှင့်မဲတူးနေသောလူများကို မြင်ဖူးကြပေမည်😂😂) ။ တစ်ချို့ကမာသည် တစ်ချို့ကပျော့သည်။

နာမည်နာမတစ်ခုပေးပြီးသည်နှင့် လွယ်လွယ်နှင့်ပြင်ဖို့ခက်ပေသည် ။ ထိုကြောင့် နာမည်ပေးရာတွင် သေခြာစဉ်းစားဖို့တော့လိုပေသည်။

နေ့သင့်နံသင့်နာမည်အစများ

တနင်္လာ က၊ခ၊ဂ၊ဃ၊င

အင်္ဂါ စ၊ဆ၊ဇ၊ဈ၊ည

ဗုဒ္ဓဟူး ရ၊ယ၊လ၊ဝ

ကြာသာပတေး ပ၊ဖ၊ဘ၊ဗ၊မ

သောကြာ သ၊ဟ

စနေ တ၊ထ၊ဒ၊ဓ၊န

တနင်္ဂနွေ အ၊ဥ၊ဧ စသည်တို့ဖြစ်သည်။

နာမည်တစ်ခုစီတိုင်းတွင်`ဗျည်း၊သရ´တို့ဖြင့်တည်ဆောက်ထားပြီး ၎င်း`ဗျည်း၊သရ´တို့တွင် ဂဏန်းတန်ဖိုးများသက်မှတ်ထားရှိကြသည်။

ဗျည်း၊သရ တို့၏ဂဏန်းတန်ဖိုးများကတော့

၁။ အ၊ဥ၊ေ၊ ါ၊ ိ၊ ီ၊ ု ၊ ူ ၊ ဲ၊ ံ့၊ ်၊ း ၊ တန်ဖိုးက ၈

၂။ က၊ခ၊ဂ၊ဃ၊င. တန်ဖိုးက ၅

၃။ စ၊ဆ၊ဇ၊ဈ၊ည. တန်ဖိုးက ၆

၄။ ယ၊ရ၊လ၊ဝ၊ ျ(ယပင်း)၊ ြ (ယရစ်)၊ ွ(ဝဆွဲ) တန်ဖိုး၃

၅။ ပ၊ဖ၊ဘ၊ဗ၊မ. တန်ဖိုး ၁

၆။ သ၊ဟ၊ ှ(ဟထိုး) တန်ဖိုး ၂

၇။ တ၊ထ၊ဒ၊ဓ၊န. တန်ဖိုး ၇

၈။ ဋ၊ဌ၊ဍ၊ဃ၊ဏ. တန်ဖိုး ၄ တို့ဖြစ်ကြသည်။

နာမည်တစ်ခု၏`ဗျည်း၊သရ´ဂဏန်းတန်ဖိုးများကိုပေါင်းလိုက်ခြင်းအားဖြင့် နာမည်တစ်ခု၏စုစုပေါင်းတန်ဖိုးကိုရရှိပေမည်။

ရရှိလာသောစုစုပေါင်းတန်ဖိုးကို(၈)ဂဏန်းဖြင့်စားသော် အကြွင်းရရှိပေမည်။ ရရှိလာသောအကြွင်းများကိုမူတည်၍ နာမည်အဟောများရှိပေသည်။

ထိုနာမည်အဟောများသည် ကုန်းဘောင်ခေတ် ပေမူ ပရပိုက် တို့မှဖြစ်ပါသည်။ သင့်နာမည်ကောင်းမကောင်းကိုတွက်ကြည့်နိုင်ပါသည်။

ဥပမာ ကျနော့်နာမည်ပေါ့

ဇော်နေလ =(၈+၆+၈+၈)+(၈+၇)+၃

= ၃၀+၁၅+၃

=၄၈

၄၈÷၈=.စားလဒ်(၈)၊အကြွင်း(ဝ)ထိုကြောင့် `ဇော်နေလ´သည်အကြွင်း(ဝ)ဖြစ်၍ `လင်းတ´နာမည်ဖြစ်သည်။

အကြွင်း(၈)သိုမဟုတ် (ဝ) `လင်းတ´နာမည်အဟော 😀

`လင်းတ´နာမည်သည် ငုပ်လိုက်ပေါ်လိုက်ဖြစ်နေမည်။ ကိုယ့်အကြံအစည်ကိုသူများကလုပြီးလုပ်ခြင်းခံရတတ်မည်။

အရှက်တကွဲဖြစ်ဖို့လွယ်မည်။စိတ်မတည် မငြိမ်ဖြစ်နေတတ်မည်။ဆရာသမား လူကြီးများအတွက်အနစ်နာခံရမည်။

အကြွင်း(၁)`တံခွန်´နာမည်အဟော😀

`တံခွန်´နာမည်မျိုးခေါ်တွင်ခံရသူများသည်ကျော်ကြားသောအောင်မြင်သူများဖြစ်သည်။ အနုပညာဖြင့်အောင်မြင်လိမ့်မည်။

လူအများနှင့်ဆက်နွယ်ပက်သက်နေပြီး အများကိုကြီးကြပ်ကွပ်ကဲအုပ်ချုပ်လုပ်ကိုင်ရသူဖြစ်မည်။ တစ်ခုထက်မကသော အလုပ်အကိုင်များကို

တစ်ပြိုင်တည်းလုပ်ကိုင်ရသူဖြစ်မည်။ သေလျှင်သော်မှနာမည်ကျန်ရစ်မည်။ ၎င်းနာမည်မျိုးများသည်အတ်ုက်အခံနှင့်ယှဉ်၍အောင်မြင်တတ်ကြ၏။

အကြွင်း(၂)`အခိုး´နာမည်အဟော😀

`အခိုး´နာမည်သည်သြဇာအာဏာတည်တံ၏။ ဘဝတစ်လျှောက်လုံးတိုးတက်သည်ထက် တိုးတက်အောင်စနစ်တကျလုပ်တတ်၏။

လူအများနှင့်စပ်ဆိုင်သောအလုပ်များကို လုပ်တတ်၏။လုပ်ချင်သည့်လုပ်ငန်းကိစ္စများကိုမဖြစ်မနေလုပ်တတ်၏။

အကြွင်း(၃)`ခြင်္သေ့´နာမည်အဟော😀

`ခြင်္သေ့ ´နာမည်သည်လူသိများမည်။နေရာမရ ရအောင်ကြိုးစားမည်။ထင်ပေါ်ကျော်ကြားလူသိများမည်။ အာဏာတန်ခိုးကြီးမည် ထိပ်ကိုရောက်ပြီးပြန်ဆင်းတတ်သည်။

အကြွင်း(၄)`ကျား´နာမည်အဟော😀

`ကျား´နာမည်သည်အတက်အကျမြန်တတ်၏။ ကံတရားသည် ဘီးကဲ့သို့ ကောင်းတာလုပ်လျှင်ကောင်းကျိုးခံစားရမည်။ဆိုးတာလုပ်လျှင်ဆိုးကျိုးခံစားရမည်ဖြစ်၏။

အတိုက်အခံယှဉ်၍အကျိုးပေးတတ်၏။စိတ်ကူးကိုအကောင်အထည်ဖော်တတ်၏။

အကြွင်း(၅)`နွားနာမည်အဟော😀

`နွား´နာမည်ရှင်သည်လူအများ၏အသုံးချခြင်းကိုခံရလိမ့်မည်။အများအတွက်အနစ်နာခံရမည်။အခွင်အလမ်းကောင်းများတွေ့မည်။ရန်သူ၏အတိုက်အခိုက်ခံရမည်။

အကြွင်း(၆)`မြင်း´နာမည်အဟော😀

`မြင်း´နာမည်သည်အလုပ်အမျိုးမျိုးတို့ကိုလုပ်ရမည်။လှုပ်ရှားမှုများမည်။ အတက်အကျအမြဲရှိတတ်သည်။သေးငယ်သောပြဿနာမှကြီးမားသောမှုခင်းများအထိဖြစ်တတ်သည်။

အကြွင်း(၇)`ဆင်´နာမည်အဟော😀

`ဆင်´နာမည်သည်ရေရှည်စီမံကိန်းချပြီးလုပ်ရသည့် လုပ်ငန်းများတွင်အောင်မြင်အကျိုးပေးမည်။ ဘဝကိုတည် ငြိမ်အေးချမ်းစွာ လျှောက်လှမ်းရမည်။ ဖျော်ဖြေမှုအနုပညာလုပ်ငန်းများဖြင့် အကျိုးပေးမည်။

ကဲမိတ်ဆွေတို့လည်းမိမိတို့နာမည်ကိုတွက်ချက်ကြည့်နိုင်ပေမည်။ မိဘ မောင်နှမ ဆွေမျိုး သူငယ်ချင်း နီးစပ်သူများကိုလည်းတွက်ချက်ပေး၍ မန်းရှင်းခေါ်ပေးနိုင်လေပြီ။

Leave a Reply